زعلان كده ليه؟
زهقت من وضعك..؟
تعبت من كتر الصدمات..؟
مستعجل عشان تسيب البيت..؟
نفسك في نهاية لخنقة الثانوية العامة؟
بتحلم تخلص جامعة وتكون شخصية مستقلة؟
بتعِد الأيام تخلص جيشك وتقول على الجراية عيش؟
تعبت من شغلك اللي مش مناسبك ولا مريحك؟
بتعاني من مديرك مطلع عُقده عليك؟
ولا من زمايلك اللي له باعوك؟
ولا من صحاب نسيوك؟
ولا حبايب خدعوك؟
متقلقش خالص
كل ده 👆 مجرد مسألة وقت..
أيوه.. مش أكتر من مجرد مسألة وقت..
مهما كان الوقت ده كتير أو كبير أو حِمل تقيل..!
هييجي الوقت وتكتشف إنه كل قليل أو صغير أو جميل!
- هيجي الوقت اللي تعرف فيه إن ضغط الثانوية العامة، كان أقل ضغط نفسي ممكن يقع عليك وسط ضغوط أكتر هتعيشها..
- هيجي الوقت وهتعرف إن صاحبك اللي كان بيخبي عليك إنه بيذاكر بالليل، أهون بكتير من صاحبك اللي باعك عند مديرك عشان يترقى قبلك، أو بدل منك..
- هيجي الوقت وتعرفي إن صاحبة عمرك في الثانوية والكلية اللي خطفت منك الكراش بتاعك، أهون بكتير من صاحبة عمرك اللي لفت على جوزك وإتجوزته بعد ما كان بيحل مشكلتها مع طليقها..
- هيجي الوقت وتعرف إن عُقد الدكتور النفسية اللي بيطلعها عليك في المحاضرات ونتائج الإمتحانات الوحشه، أهون بكثير من كلاكيع مديرك النفسية اللي بيعيشها معاك وعليك أكتر من نص يومك، ويمكن أكتر من نص عمرك..!
- هيجي الوقت وتعرف إن الكريمات والدهانات اللي والدتك كانت دايماً تدهن بيها ركبها ورجليها.. أهم بكتير من المكياجات اللي زوجتك بتتخانق معاك عليها..!
- هيجي الوقت وتعرفي خطأ معلومة إن الراجل ميعيبوش غير جيبه.. لأن الراجل يعيبه أخلاقه، ودينه، يعيبه كل شيء إلا جيبه اللي ممكن يملاه بعد كده.. يعيبه إنه ميكونش راجل..!
- هيجي الوقت وتعرف إن عمرك الحقيقي.. هو اللي إنت متضايق منه دلوقتي وعايزه يمر بسرعة..
- هيجي الوقت وتعرف إن الصحاب الحقيقيين هم اللي كملوا من إعدادي لثانوي ودخلوا الجامعة من غير ما سرّهم يطلع بره عنهم..
- هيجي الوقت وتحس بقيمة كل لحظة في الجامعة ضيعتها في سماع أغاني حزينة أو قررت متروحش لأنك زهقان من دفعتك..
- هيجي الوقت وتعرف إن رحلة الصحاب بفقرها كانت ألذ وأجمل من وجودك في شرم أو الغردقة أو جُذر المالديف.. وانت مهموم بالشكل ده..!
- هيجي الوقت وتعدي الثانوية، وتتخرج من الكلية، وتخلص جيش، وتتجوزها.. وتعرف إن اللي حبيتها مش هتكون حريصة على سعادتك زي اللي كانت بتحبك وأنت عامل مش عارف، لمجرد انها مش بيضه أو مش رفيعه، أو مش طويله..!
- هيجي الوقت وتتخرجي وتشتغلي وتترقي في شغلك وتركبي عربيتك وتبني نفسك وتلفتي نظر مديرك أو زميلك الأشطر منك.. وهتعرفي إنه مش هيكون الزوج الحريص على سعادتك بقدر ما هو حريص إنك تتشقلبي وتسعديه..!
متقلقش أبداً، إطمن فعلاً
هيجي الوقت مهما طال وقتك..
كل الحكاية انها مجرد مسألة وقت..!
بس المهم.. إزاي هيعدي عليك الوقت ده؟
عشان كده ركّز في دلوقتي (الآن)..
وعيشه بكل طاقتك الحالية وحماسك به،
لو ندمت على الماضي، إفتكر ما إتعلمته منه،
لو قلقت من المستقبل، إفتكر إنه بإيد ربك وربه..
ولو خفت في الحاضر، ركز تنجح هيقل خوفك عنه..
هي حقيقة The Power Of Now قوة الحاضر الآن ✊
إستمتع بكل لحظة بتعيشها.. دون ما تبرمج عقلك
على أنها أسوء مرحلة بحياتك لأن الحقيقة غير كده ✋
إستبشر بالصُحبة الحلوة واللّمة والأحلام والطموحات،
مهما قابلت فيهم من منفسنين عاملين ليهم جناحين 🕊
إبسط نفسك باللي في إيدك..
عشان تتعود تعيش سعيد من قلبك
ناجح في كل اللي بتعمله لنفسك ولغيرك
وييجي الوقت.. وقت ما ييجي.. زي ما ييجي..
وأنت مبسوط بكل اللي كان وحصل وفرحان بيه..
هييجي الوقت.. مش مهم
المهم انه وقت ما ييجي الوقت..
هتكون عامل إيه، وبتعمل وهتعمل إيه؟