سوف ابدا انا
انا من الجزائر وبالتحديد اصولي من شرق الجزائر
الاكلة المشهورة لدينا هي ( الشخشوخة)
سوف تتساءلين ماهي الشخشوخة؟
الشخشوخة هي أكلة شعبية جزائرية مشهورة وخصوصا في مدينة بسكرة ومدن الشرق الجزائري كباتنة وعنابة والمسيلة وسطيف و حتى مدن السهوب كالجلفة و الأغواط ، تُطبخ في المناسبات خاصة الاعراس والأعياد وهي عبارة عن عجينة تخلط من القمح اللين والماء والملح تعجن جيدا ثم تقطع إلى قطع صغيرة وتفتح القطعة الصغيرة براحة اليد خاصة بترقيق العجائن وتطهى في إناء حديدي.
الان سوف اقدم لكم كيقية طبخها
مقادير العجين : دقيق رطب من النوع الجيد لي يكون فيه العلك +كمشة فرينة +ملح +ماء أعجني و أدلكي كيما عجين المحاجب و خليه يرتاح
قطعيه كويرات صغيرة لانه رايحيننعملوا كل 2 طبعا إستعملي الزيت ... في الصورة يبانو كبار بصح هما صغار و أطلقوا كي إرتاحوو
هنا تبداي ضعي الطاجين يسخن على نار هادئة
حطي كويرتين فوق بعض و ديري بيناتهم الزيت و أبداي تحلي رقيق وارفعيها حطيها فوق الطاجين و غير تشوفيها نشفت أقلبيها رايحة تنتفخ شوفي
هنا ارفعيها و ضعيها يطيبو الجواشي ممبعد انزعيها و حطي أخرى طيب و هكذا
طبعا ما ان تنزعيها لازم تفتيها بسرعة حتى لن تيبس ممبعد تجيك صعيبة المهم لازمك اتقرصي القرصة و طيبيها و تفتيها في نفس الوقت وإذا عندك البنات أو لي يعاونك نقولك ياسعدك هههه أعطيهم يفتولك
كما انه يجب ان تغطيها ما ان فتتيها حتى لن تنشف
ان حضرت الفتات ليلة من قبل عليك يوم التقديم اما ان تفوريها او تسخنيها في الفرن لدقائق فقط حتى لا تيبس
الان ننتقل للمرق:
نحتاج قطع لحم أو دجاج
بصل كمية مليحة وكل ماكان المرق بزاف كل مانزيدو البصل بزاف
2 حبات طماطم مرحية
راس ثوم(متوسطة الحجم)
قليل من الزيت، ملح. ملعقة أكل فلفل أحمر مرحي و لي يحب الحار يزيد
لفاح و هو كسبر حب مرحي متبل فيه بزاف حوايج أخرين( راس الحانوت)
قطعة صغيرة سكر أو باش يوزن حموظة الطماطم
حمص ، طماطم علب ، و فلفل أخضر
كما تستطعين ان تضيفي بعض الخضار (لفت .جزر حبة واحدة )
يوجد من يضع بطاطس نحن لا نضعها
نرحي البصل و الثوم و الطماطم الحب و نفرغ على اللحم +نحط التوابل ملعقة فلفل أحمر +ملعقة لفاح +ملح +سكر+الشحم +الحمص +شوية زيت+طماطم علب+و نحمص كلشي مليح مليح تم نمرق و ندير قليل من الحشيش مقطع و نغلق الكوكوطة(قدر الضغط) تطيب حتى يطيب اللحم ( من الاحسن الثوم ان يهرس)
ننزع اللحم ثم نعطر المرق بملعقة لفاح أو الكسبر المرحي و نزيد الفلفل الأخضر نشقه و نرميه في المرق و هذه هي مرقتنا وجدت
لطريقة التقديم
نحضر قصعة أو طبسي( صحن)عريض =نضع الرقاق ثم نسقيه بالمرق ثم نحط الرقاق ثم نزيد نسقيه و هكذا حتى نكمل و نعمر الطبسي نزين بالحمص و الفلفل المقطع و اللحم و نقدمه مباشرة مالازمش يقعد مدة طويلة لانه يبرد و ينشف و تروح بنتو
و راكم معروضين أتفضلو حبيباتي