أخر جزئية هتكلم عنها بالنسبة للخيوط هيا الورقة الملصقة او
الملفوفة حول الخيط والتى تحتوى على كل معلومات الخيط
تعرف بإسم Yarn label أو ball band
طبعا كثير مننا لما بنشترى الخيط أول حاجه بنعملها إننا بنرمى الورقة
مع إنها فى قمة الأهمية لأننا بنعرف من خلالها حاجات كتير جدا
تعالوا بينا نتعرف على المعلومات اللى على الورقة وأهميتها
أكيد كل ورقة بتختلف من نوع للتانى بس معظم المعلومات بتبقا
واحدة
والصوة التالية مثال هنشرح عليه
1/ أول حاجه ممكن نشوفها على الورقة هيا الإسم التجارى للخيط وخامة الخيط ومكوناته
2/ وزن البكرة 100 جرام وطول الخيط بالمتر وبالياردة والجزئية دى مهمه علشان نعرف هنجيب قد إيه من الخيط بكرة ولا إتنين وهكذا
3/ قياس الوحدة ومقاس الإبر المطلوبة فى المثال ده جايب قياس
الوحدة لو هتشتغلى تريكو وكمان لو هتشتغلى كروشيه
وهنا قياس الوحدة للتريكو 21 غرزة×25 سطر بإبر تريكو
مقاس 4 مللى وطبعا دى أهم نقطة فى الورقة كلها ومن خلالها
بنحدد مقاس الإبر اللى هنشتغل بيه الخيط
4/ سمك الخيط فى المثال الخيط سمكه 3 خفيف زى ما إحنا
شايفين الرمز على الورقة
5/ بلد المنشأ تركيا
6/ تعليمات التنظيف والغسيل ودى برضه مهمة
أنا جبتلكم صورة مجمعة لكل الرموز الممكنة لتعليمات الإعتناء بالخيوط
7/ لون الخيط ورقمه (lot أو renk) اللون معروف ولكن حتى لو نفس اللون بيختلف درجاته حسب الصبغه علشان كدا مهم
جدا تعرفى رقم اللون ليه؟
لو إنتى شغاله مثلا فى موديل معين والخيط خلص منك ومحتاجه
تجيبى خيط بنفس اللون لازم تتأكدى من رقم اللون علشان
ميحصلش تفاوت فى اللون أثناء الشغل وللسبب ده لازم تحتفظى بالورقة دى لحد ماتخلصى شغلك
8/ الشركة المنتجة ومعلومات عنها